सुरेश बिडारी
५ भदौ, वीरगञ्ज । कोरोना संक्रमणसँग मिल्दोजुल्दो लक्षण भएका रौतहटका एक जना पुरूषको उपचारको क्रममा वीरगञ्जमा मृत्यु भएको छ । रौतहटको ईशनाथ नगरपालिका–९ डुमरिया बस्ने ५५ वर्षीय पुरुषको आज बिहान मृत्यु भएको हो ।
वीरगञ्जको नारायणी अस्पतालको आकस्मिक कक्षमा उपचारको क्रममा उनको मृत्यु भएको अस्पतालका डाक्टर निरज सिंहले जानकारी दिए ।
ज्वरो, खोकी, पखाला र श्वासप्रश्वासमा समस्या देखिएपछि उनलाई शिवदर्शन सेन्ट्रल अस्पताल रौतहटमा उपचार गरिएको थियो । स्थितिमा सुधार नआएपछि अस्पतालले थप उपचारका लागि उनलाई वीरगञ्ज रिफर गरेको थियो । गम्भिर अवस्थामा नारायणी अस्पतालको आकस्मिक कक्षमा ल्याइएका उनको मृत्यु आज बिहान ३ः३५ बजे भएको अस्पतालले जनाएको छ ।
रौतहटमा गरिएको एक्स–रे हेर्दा उनको दुवैतिरको फोक्सोमा निमोनिया देखिएको चिकित्सकले बताएका छन् सास फेर्न गाह्रो भएर अस्पताल ल्याइएको रहेछ, शरीरमा अक्सिजनको मात्रा निकै कम भइसकेको थियो,’ उपचारमा संलग्न चिकित्सकले भने, ‘बचाउन सकिएन ।’
उनमा कोरोना संक्रमण छ या छैन भन्ने यकिन गर्न स्वाबको नमुना संकलन गरिएको छ । दिउँसोतिर परीक्षण रिपोर्ट आउने नारायणी अस्पतालको पीसीआर ल्याबले जनाएको छ ।अनलाइन खबर
