जनकपुरधाम : धनुषाको शहिदनगर नगरपालिका ३ का जनता एकाई मावि यदुकोहाका निमित प्राचार्य प्रमोद कर्णले अदालतको आदेशलाई समेत वेवास्ता गरेको तथ्य खुलेको छ ।
अदालतले अभिभावक भेला गराउनका लागि आदेश जारी गरको छ । पछि शहिदनगर प्रमुख उदयकुमार बरबरियाले समेत अभिभावक भेला गराउन विद्यालयलाई ०७६ भदौं ४ मा पत्र पठाएर अनुरोध गरे । तर विद्यालयका प्राचार्य कर्णले न अदालतको आदेश न नगर प्रमुखको अनुरोधलाई वास्ता गरेका छन् ।
प्राचार्य कर्णले हालसम्म अभिभावक भेला बोलाउन चासो देखाएका छैन । अहिले स्थानीयले समेत अभिभावक भेला बोलाई व्यवस्थापन समिति गठन गर्न दबाब दिन थालेका छन् । तर प्राचार्य कर्णले स्थानीयको कुरा सुन्न पनि तयार छैन ।
प्राचार्य कर्णले माघ १३ मा सूचना जारी गरेर वडाध्यक्ष तथा तत्कालिन विद्यालय व्यवस्थजापन समितिका अध्यक्ष नागेन्द्र प्रसाद मण्डलको मौखिक जानकारीको आधारमा अभिभावक भेला गराउन नसकेको जानकारी गराएको छ । स्थानीयका अनुसार वडाध्यक्ष मण्डलको मिलोमतोमा प्राचार्य कर्णले अभिभाव भेला बोलाउन चाहेका छैन ।
स्थानीय सुनिता सिंहले भ्रष्टाचार गर्नकै लागि प्राचार्य कर्णले वडाध्यक्षको मिलोमतोमा मनपरी काम गरिरहेको आरोप लगाइन् । उनले विगत लामो समयदेखि प्राचार्य कर्णले छात्रबृति रकम वितरण नगरेको पनि बताईन् । उनले भनिन्, ‘विगतको भ्रष्टाचार बाहिरिने र अब भ्रष्टाचार गर्न नपाउने सोचेर व्यवस्थापन समिति गठन गर्न उनीहरु चाहेका छैन ।’
विद्यालयमा पठनपाठनको अवस्था समेत लथालिङ बनेको स्थानीय अभिभावकहरु बताउँछन् । विद्यालयका प्राचार्यले अभिभावकको कुरा समेत सुन्न तयार नभएको र विद्यालयमा व्यापक भ्रष्टाचार गरिरहेको स्थानीयको आरोप छ ।
