मधेश सरकारको बस सार्वजनिक संस्थालाई दिइने

जनकपुरधाम। सार्वजनिक यातायातका लागि मधेश प्रदेश सरकारले खरिद गरेको बस सञ्चालन नहुने भएको छ । खरिद भएको बस प्रदेश सरकारले आफू अन्तर्गतका निकायलाई दिने निर्णय गरेको छ ।
मंगलबार बसेको प्रदेश मन्त्रीपरिषदको बैठकले यात्रुलाई चढाउन खरीद गरिएको बस आफ्ना निकायलाई दिने निर्णय भएको प्रदेश सरकारका प्रबक्ता समेत रहेका अर्थ मन्त्री शैलेन्द्र साहले जानकारी दिए ।
उनका अनुसार खरीद गरिएका ५ बसमध्ये २ वटा मधेश स्वास्थ्य विज्ञान प्रतिष्ठानलाई तथा १÷१ वटाका दरले कृषि विश्वविद्यालय राजविराज, कृषि तालिम केन्द्र धनुषा र प्रदेश प्रशिक्षण केन्द्रलाई दिइनेछ ।
डेढ बर्षअघि प्रदेश सरकारले यो बस खरीद गरेको थियो । दुई वटा बस जनकपुरधाम–राजविराज, दुई वटा जनकपुधराम–बीरगंज र एउटा बस राजविराज–बीरगंच संचालन गर्ने प्रदेश सरकारले जनाएको थियो ।
बस खरीद गर्ने तत्कालिन भौतिक पूर्वाधार विकास मन्त्री जितेन्द्र सोनल मन्त्री पदबाट हटाइएपछि अहिले यो मन्त्रालय कांग्रेसको नेतृत्वमा आएको छ । कांग्रेसबाट मन्त्री रहेका रामसरोज यादवले शुरुदेखि नै बस संचालन गर्न अनिच्छा प्रकट गर्दै आएका थिए ।