कांग्रेसकाे प्रदेश २ अधिवेशनमा पाँच जना निर्विरोध

जनकपुरधाम, पुस ७ गते
नेपाली कांग्रेस प्रदेश २ को अधिवेशनमा सदस्य पदमा पाँचजना निर्विरोध भएका छन् ।
प्रदेश निर्वाचन समितिले प्रकाशित गरेको अन्तिम नामावली अनुसार पाँचजना सदस्य पदमा निर्विरोध निर्वाचित भएका छन् । निर्विरोध हुनेमा प्रत्येक जिल्लाबाट प्रदेश सदस्य खुल्लामा सप्तरीका आशाराम चौधरी निर्विरोध भएका छन् ।
त्यस्तै प्रत्येक जिल्लाबाट महिला सदस्यमा सप्तरीकी विमला देवी साह, महोत्तरीकी उषा देवकोटा र पर्साकी किरण कुमारी शर्मा निर्विरोध भएकी छिन् ।
त्यस्तै प्रदेश सदस्य आदिवासी जनजातिबाट मनमाया तामाङनी निर्विरोध भएको निर्वाचन संयोजक प्रह्लाद गौतमले जानकारी दिए ।
बाँकी पदका लागि आज निर्वाचन हुने जनाइएको छ । अन्तिम नामावली प्रकाशन भएपछि अहिले व्यालेट छपाउने काम भइरहेको छ ।