सर्लाहीकाे मलंगवाबाट एक लाख भन्दा बढी नक्कली नोट सहित दुईजना पक्राउ

सर्लाहीबाट दुई जना भारतीय नागरिक नेपाली नक्कली नोट सहित पक्राउ परेका छन् ।
जिल्ला प्रहरी कार्यालय सर्लाहीका अनुसार पक्राउ पर्नेमा भारत बिहार राज्य जिल्ला सितामढी थाना सोनवर्षा ग्राम सोनवर्षा वडा नं. ६ चिलरी टोलका ३७ वर्षीय आशिष भन्ने सुरेन्द्र महतो र वडा नं. १ का ४८ वर्षीय प्रमोद कुमार रहेका छन् ।
जिल्ला प्रहरी कार्यालय सर्लाहीका प्रहरी प्रवक्ता प्रहरी नायव उपरीक्षक माधव प्रसाद वुढाथोकीका अनुसार शनिवार बेलुका करिब साढे ७ बजेको समयमा नेपाल प्रहरी र सशस्त्र प्रहरीको संयुक्त टोलीले सर्लाहीको मलंगवा नगरपालिका वडा नं. ८ गोरखकाली स्थित भन्सार कार्यालय अगाडी चेकप्वाईन्ट थापी चेकजाँच गर्ने क्रममा दुवैजनालाई पक्राउ गरेको हो ।
पक्राउ परेका दुवैजनाको मोटरसाईकल तलासी लिदा मोटरसाइकलको डिक्की र सिटको बिचको भागबाट नक्कली जस्तो देखिने एक हजारको ११५ वटा नेपाली नोट, ४७ हजार ५१० भारतीय रुपैयाँ र १७० नेपाली रुपैयाँ बरामद भएको जिल्ला प्रहरी कार्यालय सर्लाहीले जनाएको छ ।