विनोद महतो
महेन्द्रनगर, असोज १६ ।
विजया दशमीको २०७८ को अवसरमा धनुषाको मिथिला नगरपालिका वडा नं. ५ विश्रामपुरमा शनिवार देखि मैत्रीपूर्ण फुटलबल प्रतियोगिता शुरु भएको छ । मिथिला नगरपालिका वडा नं. ५ स्थित श्री विश्रामपुर युथ क्लवको आयोजनामा मैत्रीपूर्ण फुटबल प्रतियोगिता शुरु भएको हो ।
फुटबल प्रतियोगिताको उद्घाटन खेलमा मधुवासा र केम्लीपुर बीच प्रतिस्पर्धा भएको छ । सो खेलमा मधुवासाले 0 का विरुद्ध २ गोलले जित हासिल गरेकोे छ । मधुवासाका लागि जर्सी नं. ७ का उज्वल मगर र जर्सी नं. १८ का रन्जन मगरले १/१ गोल गरेका छन् । फुटबल प्रतियोगिताको उद्घघाटन विश्रामपुर युथ क्लवका अध्यक्ष दिलबहादुर मगरको अध्यक्षता तथा मिथिला नगरपालिका वडा नं.५ का वडाअध्यक्ष श्यामबाबू यादवको प्रमुख आतिथ्यमा गरिएको छ । साे अवसरमा विशेष अतिथिको रुपमा सामुदायिक वन उपभोक्ता महासंघ प्रदेश २ का अध्यक्ष साेम प्रसाद शर्मा, हिमाल मगर लगायतको उपस्थित रहेको थियो । खेलमा योगेन्द्र यादवले एम्पायर तथा राजेश भुजेल र हेम बलम्पाकीले लाइन्सम्यानको रुपमा खेलाएका छन् ।
सो प्रतियोगितामा जम्मा ८ वटा फुटबल टिमको सहभागिता रहेको आयोजक विश्रामपुर युथ क्लवले जनाएको छ । सो प्रतियोगितामा मधुवासा, केम्लीपुर, धारापानी स्कुल टोल, मुलावारी, विश्रामपुर ‘बी’ टिम, मरधर मगर टोल, बटेश्वर, विश्रामपुर ‘ए’ टिमको सहभागिता रहेको छ । प्रतियोगिता अन्तर्गत असोज १७ गते दोस्रो खेलमा धारापानी स्कुल टोल र मुलावारीबीच खेल हुनेछ । यस्तै असोज १८ गते विश्रामपुर ‘बी’ टिम र मरधर मगर टोलबीच खेल हुनेछ भने असोज १९ गते बटेश्वर र विश्रामपुर ‘ए’ टिमबीच खेल हुनेछ ।
विजया दशमीको अवसरमा असोज १६ गतेदेखि शुरु भएको सो प्रतियोगिताको पहिलो सेमिफाइनल २० गते र दोस्रो सेमिफाइनल खेल २१ गते हुनेछ भने अन्तिम फाइनल खेल असोज २३ गते हुने तालिका रहेको छ । प्रतियोगिता विश्रामपुर युथ क्लव विश्रामपुरको खेल मैदानमा भईरहेको आयोजक क्लवका अध्यक्ष दिल बहादुर मगरले जानकारी दिएका छन् । सो प्रतियोगिताको प्रथम पुरस्कार १० हजार र दोस्रो पुरस्कार ५ हजार सहित ट्रफी र मेडल समेत प्रदान गरिने आयोजकले जनाएको छ ।
