जसपा संसदीय दलको बैठकसंगै रात्रिभोज सकियो

जनकपुरधाम, भदौ २० गते ।
आफ्नै पार्टीको संसदीय दलको बैठकमा मुख्यमन्त्री लालबाबु राउतको चर्को आलोचना भएको छ ।
जसपाको प्रतिनिधिसभा सदस्य, राष्ट्रिय सभा सदस्य र प्रदेश संसदीय दलको शनिबार जनकपुरमा भएको संयुक्त बैठकमा लालबाबु राउत सरकारको कामकारबाहीको चर्को आलोचना भएको हो ।
अध्यक्ष उपेन्द्र यादवको विशेष उपस्थितिमा ८ घण्टा बढी चलेको बैठकमा बोल्ने अधिकांश सांसदले प्रदेश सरकार भ्रष्टाचारमा डुबेको, कामकारबाही ठीक नभएको, सुशासन पारदर्शीताको प्रत्याभूति नभएकाले पार्टीमाथि समेत जनतामा वितृष्णा हुन थालेको सांसदहले गुनासो गरेका छन् ।
एक सांसदले दिएको जानकारी अनुसार दिउँसो १ बजेदेखि राति ९ बजे चलेको लामो बैठकमा अधिकांश सांसदले लालबाबु राउत सरकारकै कामकारबाहीको विषयमा असन्तुष्टि पोख्नुका साथै राजिनामा माग गरेका छन् ।
सांसदहरुले गरेको ब्यापक आलोचना पश्चात बैठकले लालबाबु राउत सरकारको काम कारबाहीको पत्येक महिना अनुगमन गर्न एक समिति गठन गर्ने निर्णय गरको छ ।
यस्तै संगठन सुदृढिकरण (सुज) अभियान प्रभावकारी कसरी बनाउने, प्रदेशका जनताले सुशासनको अनुभूति लगायत पार्टीलाई अझ सशक्त कसरी बनाउने विषयमा छलफल भएको अर्का प्रदेश सांसद ज्ञानेन्द्र यादवले जानकारी दिए ।
सरकारको कामकारबहीको प्रत्येक महिना अनुगमन गरी प्रतिवेदन तयार गर्न जसपाले केन्द्र स्तरमै एउटा समिति निर्माण गर्ने निर्णय भएको उनले बताए ।
बैठकबाट एक महिना भित्र सरकारको कामकारबाही सुधार गरी गुणस्तरीय गर्न मुख्यमन्त्री राउतलाई निर्देशन दिइएको जनाइएको छ ।
जनकपुरको वेलकम होटेलमा बसेको बैठकमा जसपाका प्रदेश २ का ३७ जना प्रदेश सांसद, जसपाका प्रतिनिधिसभा र राष्ट्रियसभाका सबै सदस्यहरुको उपस्थिति रहेको थियो । संसदीय दलको बैठक पश्चात रात्रि भोजको आयोजन गरिएको थियो । भोजामा साकाहारी र मान्साहारी भोजनको व्यवस्था रहेको एक प्रदेश सांसदले बताए ।