प्रदेश २ का मेयरहरु राजा हुन सभामुखको गुनासो

२० असार, सप्तरी । प्रदेश २ का सभामुख सरोजकुमार यादवले स्थानीय तहका प्रमुखहरु जनसेवक बन्न नसकेको बताएका छन् । संघीयता आएपछि गाउँगाउँमा सिंहदरबार आउने भनिए पनि स्थानीय तहमा राजदरबार आएको उनले टिप्पणी गरे ।
सप्तरी जिल्लासभालाई आइतबार राजविराजमा सम्बोधन गर्दै सभामुख यादवले स्थानीय तहका प्रमुखहरु राजाभन्दा कम नरहेको आरोप लगाए । ‘संघीयता आएपछि सिंहदरबार गाउँमै आउने चर्चा थियो,’तर आएन राजदरबार चाहिं आयो ।
संघीयता आए पनि जनता खुशी नभएको भन्दै उनले भने, ‘म पनि संघीयता पक्षधर नै हुँ । शुरुदेखि संघीयताका लागि लडिरहेको छु । तर, संघीयतामा जनताको इच्छा अनुसार काम भइरहेको छैन ।
सभामुख यादवले जुनसुकै पार्टीबाट चुनाव जिते पनि जनताको पक्षमा काम गर्नुपर्ने बताए । ‘आफ्नो मान्छेलाई बजेट दिने र अरुलाई नहेर्ने प्रवृत्ति राम्रो होइन । म पनि कुनै पार्टीबाटै जितेर आएको हुँ । तर इमान्दारीपूर्वक काम गरेको छु,’ उनले भने ।
जनताको प्रतिनिधि बनेर केन्द्र र प्रदेशमा गएका सांसदहरु जिल्लासभामा उपस्थित नहुनु बिडम्बनाको कुरा भएको बताए ।