ठाकुर तर्फका शक्तिशालि नेता राजकिशोर यादव सरकारमा किन गएनन्?

काठमाडौं- जनता समाजवादी पार्टी (जसपा)का अध्यक्ष महन्थ ठाकुरबाहेक अधिकांश शीर्ष नेता सरकारमा सहभागी हुने भएका छन्।
तत्कालीन राष्ट्रिय जनता पार्टी (राजपा) पक्षबाट महेन्द्र राय यादव बाबुराम भट्टराई-उपेन्द्र यादवपक्षको कित्तामा लागिसकेकाले उनी मन्त्री हुने सम्भावना भएन। तर, महन्थ-राजेन्द्रपक्षमै भएका राजकिशोर यादव सरकारमा सहभागी भएका छैनन्।
तत्कालीन राजपा हुँदा ६ जना अध्यक्षमध्येमा एक जना उनीसमेत थिए। चक्रिय प्रणालीअन्तर्गत ६ जना अध्यक्षले नेतृत्व गर्नेक्रममा यादवले पार्टीको नेतृत्व सम्हाल्ने अवसर पाएका थिए। यादव पहिलो संविधान सभा निर्वाचनमा मधेसी जनाअधिकार फोरमबाट सिराहबाट प्रत्यक्ष निर्वाचित भएका थिए।
बाबुराम भट्टराई नेतृत्वको सरकारमा सूचना तथा सञ्चारमन्त्री जयप्रकाशप्रसाद गुप्ता भ्रष्टाचारको आरोपमा जेल गएपछि राजकिशोरले सञ्चारमन्त्री हुने अवसर पाएका थिए। तत्कालीन फोरम गणतान्त्रिकबाट अर्को शीर्ष नेता नभएकाले यादवले मन्त्री हुने अवसर पाएका थिए। यस्तै दोस्रो संविधान सभा निर्वाचन २०७० मा पराजित भएकाले पनि मन्त्री हुने अवसर पाएनन्।
गत २०७४ सालको निर्वाचनमा सिराह क्षेत्र नम्बर ४ बाट प्रत्यक्ष निर्वाचित भएका थिए। अहिले प्रधानमन्त्री केपी शर्मा ओलीले दोस्रोपटक प्रतिनिधि सभा विघटन गरेपछि प्रतिगमनको आरोप लागेकाले उनी सरकारमा सहभागी नभएको हुनसक्ने नेताहरुले आकलन गरेका छन्। ‘अहिले प्रधानमन्त्रीज्यूले प्रतिनिधि सभा विघटन गर्‍यो भनेर प्रतिगामी संविधान मास्न लाग्यो भन्ने आरोप लागेको छ। त्यस्तो अवस्थामा सरकारमा जाँदा आफ्नो राजनीतिक जीवनमा असर पर्ने भएकाले सहभागी नभएको हुनसक्छ,’ महन्थ–राजेन्द्रपक्षका एक नेताले भने,‘राजकिशोरजीलाई मन्त्री नबनाउने भन्ने थिएन। उहाँले त्यति चसो दिनुभएन। त्यो भएर पनि मन्त्री नभएको हुनसक्छ।’राजकिशोरलाई पार्टीले मन्त्री नबनाएको भन्दा पनि उनी आफैंले चाहना नदेखाउँदा मन्त्री नभएको ती नेताले दाबी गरे।
यसअघि उपेन्द्र यादव नेतृत्वको फोरममा एउटै पार्टी भएकाले उनी बाबुराम-उपेन्द्रपक्षतिर समेत तानिनसक्ने कतिपय नेताहरुले आकलन गरेका छन्। तराईमा जातीय क्लस्टरले समेत विशेष अर्थ राख्ने भएकाले उनी उपेन्द्रसँगै जानसक्ने विश्लेषण हुन थालेको छ। किनकि, यसअघि नै महेन्द्र राय यादव तत्कालीन राजपापक्षलाई छोडेर बाबुराम-उपेन्द्रतिर लागेकाले त्यसको असर राजकिशोरमाथि पनि पर्नसक्ने अनुमान गरिएको छ। तर, मन्त्री हुने अवस्था हुँदाहुदै पनि राजकिशोर किन गएनन् भन्ने विषयमा भने धेरैले चासोका साथ हेरेका छन्।