नेपाल कम्युनिष्ट पार्टी (नेकपा) र नेपाली काँग्रेसले झुठको खेती बन्द गर्नुपर्ने जनता समाजवादी पार्टी नेपालका वरिष्ठ नेता एवम् पूर्वमन्त्री राजेन्द्र महतोले बताउनुभएको छ ।
प्रतिनिधि सभा विघटनको बिरुद्धमा मलंगवामा आयोजना गरिएको जनप्रदर्शन तथा बिरोध सभालाई सम्बोधन गर्दै नेता महतोले केपी ओली, प्रचण्ड र शेरबहादुर देउवा बेईमान रहेको आरोप लगाउनुभयो । उनीहरु सबै मिली जनतासंग पटक–पटक बेईमानी गरेका कारण जनता अब विकल्पको खोजीमा लागेपछि जसपाका नेताहरुका बारेमा गलत अफवाह फैलाईएको उहाँले बताउनुभयो ।
आफ्ना पार्टीको बारेमा प्रायोजित समाचार संचार माध्यममा आएको भन्दै त्यसप्रति लक्षित गर्दै नेता महतोले सो कुरा बताउनुभएको हो ।
‘आफ्ना नजिकको मिडियालाई प्रयोग गरेर जसपाका नेता पार्टी छाडेर नेकपामा जान लागेको गलत अफवाह फैलाईएको छ’,– उहाँले भन्नुभयो ‘ संचार माध्यमको गलत प्रयोग गरेर आफ्ना पार्टीको बारेमा अफवाह फैलाईए पनि कुनै असर पर्ने छैन ।
संचार माध्यमको दुरुपयोग गरेर आफ्ना पार्टीको बारेमा अफवाह फैलाईएको बताउँदै उहाँले उनीहरुको पार्टी छाडेर आफ्नो पार्टीमा प्रवेश गरेको देखेर नेकपा, काँग्रेस बिच्चलीत भएको भन्नुभयो ।
साथै आफ्ना पार्टीका नेता कार्यकर्ता तथा आम जनसमुदायलाई कुनै प्रकारको भ्रममा नपर्न उहाँले आग्रह गर्नुभयो । साथै वैकल्पीक शक्ति निर्माणमा जुटन सबैसंग आग्रह गर्नुभयो ।
नेकपा असफल भएपछि केपी ओली पतनको बाटोमा गएको नेता महतोले बताउनुभयो । झुठ तथा भ्रमको खेती बन्द गर्नुपर्ने उहाँले सुझाव दिनुभयो ।
एकल जातिय शासन र नसलिए शासनबाट जनतालाई मुक्ति चाहिएको उहाँको भनाई थियो । संसद पुर्न स्थापनाबाट पनि मधेशी, जनजाती, थारु, दलित, मुस्लिमकोे अधिकार नमिल्ने भन्दै सबै मिलि राष्ट्रिय मुक्ति आन्दोलन गर्नुपर्ने बताउनुभयो ।
‘यस देशमा सबैको लागि संविधान र सबैको अधिकार स्थापनको लागि एउटै विकल्प रहेको छ, आन्दोलन’,– उहाँले भन्नुभयो ‘जनता विकल्पको खोजीमा लागेपछि नेकपा र काँग्रेस तिलमिलाएको छ ।’
एकल जातिय नसलिए सोचबाट बनाईएको संविधान देशमा पटक पटक असफल हुँदै आएको उहाँले बताउनुभयो । प्रधानमन्त्री केपी ओलीका कारण लोकतन्त्र र संघीयता समेत खतरामा परेकोे उहाँकोे आरोप रहेको छ । संसद विघटनको कदम असंवैधानिक र अलोकतान्त्रिक रहेको बताउँदै नेता महतोले प्रधानमन्त्री ओलीले संविधानमै नरहेको व्यवस्था लागू गरेर देशलाई प्रतिगमनको दिशामा धकेलेको उहाँको भनाइ छ । संविधानको कुनै धारामा संसद विघटनको व्यवस्था नहुँदा नहुँदै पनि प्रधानमन्त्रीले आफू खुशी संसद विघटन गरेर देशलाई बर्बाद गर्न लागि परेको महतोले दाबी गर्नुभयो ।
लोकतन्त्रको रक्षाको लागि अब हामी फेरि लड्नु पर्ने बेला आएको बताउँदै महतोले भन्नुभयो, ‘हामी लोकतन्त्रको रक्षाका लागि लड्नुपर्छ, अब पनि सचेत भएनौं भने निरंकुशता हाबी हुन्छ ।’
जनप्रदर्शन तथा बिरोध सभा कार्यक्रमलाई जसपाका केन्द्रिय कार्यकारणी समिति सदस्य एवम् पूर्वमन्त्री महेन्द्र राय, चन्दा चौधरी, उमाकान्त झा, प्रदेश मन्त्री रामनरेश राय, राष्ट्रिय सभाका पूर्व सदस्य रामपृत पासमान, प्रदेश सभा सदस्यद्वाय अशोक यादव र सञ्चमाया मोक्तानले सम्बोधन गर्नुभएको थियो । कार्यक्रमको अध्यक्षता केन्द्रिय सदस्य डा. अब्दुर रहिमले गर्नुभएको थियो भने कार्यक्रममा स्वागत भाषण जिल्ला अध्यक्ष बिरेन्द्र रायले गर्नुभएको थियो ।
यसैबीच कार्यक्रममा आगण ग्रहण गराउँदा मर्यादा क्रमको ख्याला नगरेको भन्दै विघटित प्रतिनिधि सभा सदस्य प्रमोद साह, प्रदेश सभा सदस्य संजय कुमार यादव, निरा साह, केन्द्रीय सदस्य अशोक सिंह कोइरीले आशन ग्रहण बहिष्कार गर्नुभएको थियो ।
