पश्चिम नवलपरासीमा दुई लाख ७१ हजार मुल्य बराबरको अवैध कपडा बरामद

उर्मिला यादप नवलपरासी
मंसिर २४
जिल्ला प्रहरी कार्यालय पश्चिम नवलपरासीले दुई लाख ७१ हजार २ सय मुल्य बराबरको अवैध कपडा बरामद गरेको छ । बुधबार भारतबाट भन्सार छली अवैध रुपमा नेपाल तर्फ ल्याउदै गरेको ३३ रोलमा ६सय ७८ मिटर लेडिज सुरुवालको थान कपडा सिमा प्रहरी चौकी महेशपुरबाट खटिएको प्रहरी टोलीले पाल्हीनन्दन गाउंपालिका वडा नं.१ झरहीखोलाबाट बरामद गरेको जनाएको छ ।
उक्त कपडा मोटरसाईकलमा राखि ल्याउदै गर्दा प्रहरी टोलीलाई देखि कपडा फाली मोटरसाईकल सहित मानिस भागेका थिए । बरामद भएका कपडा आवश्यक कारवाहीको लागि आजै महेशपुर भन्सार कार्यालयमा बुझाईएको जिल्ला प्रहरी कार्यालय पश्चिम नवलपरासीका प्रहरी नायब उपरीक्षक राजु लामाले जानकारी दिनु भएको छ ।