गेपाल झा , महोत्तरी , चैत्र ४ गते ।
स्थानीय तहमा स्वास्थ्य सेवाको पहुँच विस्तार गर्ने उद्देश्यले अघि सारिएको “प्रत्येक वडामा एक स्वास्थ्य संस्था” भन्ने सरकारी अवधारणालाई मूर्त रूप दिँदै एकडारा गाउँपालिका वडा नं. १ मा आधारभूत स्वास्थ्य सेवा केन्द्रको औपचारिक रूपमा उद्घाटन गरिएको छ । यससँगै उक्त वडाका बासिन्दाहरूले अब आफ्नै वडाबाट प्राथमिक स्वास्थ्य सेवा सहज रूपमा प्राप्त गर्ने भएका छन् । 
वडामा आयोजित एक विशेष कार्यक्रममा गाउँपालिकाका अध्यक्ष दिपनारायण मण्डलको अध्यक्षतामा आधारभुत स्वास्थ्य सेवा केन्द्रको उद्घाटन गरिएको हो । कार्यक्रममा स्थानीय जनप्रतिनिधि, स्वास्थ्यकर्मी, महिला स्वास्थ्य स्वयंसेविका, विभिन्न राजनीतिक दलका प्रतिनिधि तथा सर्वसाधारणको उल्लेखनीय उपस्थिति रहेको थियो ।
उद्घाटन पश्चात समारोहलाई सम्बोधन गर्दै अध्यक्ष मण्डलले स्वास्थ्य सेवा नागरिकको आधारभूत अधिकार भएको उल्लेख गर्दै गाउँपालिकाले त्यसलाई व्यवहारमा उतार्न निरन्तर प्रयास गरिरहेको बताउनुभयो । उहाँले भन्नुभयो, “वडावासीलाई सामान्य स्वास्थ्य सेवाका लागि टाढा जानुपर्ने बाध्यता अन्त्य गर्न यो सेवा केन्द्र स्थापना गरिएको हो । आगामी दिनमा यसलाई थप व्यवस्थित र सुविधासम्पन्न बनाउँदै लैजानेछौ ं।”
उहाँका अनुसार हाल उक्त स्वास्थ्य केन्द्रमा एक जना स्वास्थ्यकर्मी, एक जना अनमी, एक जना कार्यालय सहयोगी लगायत गरी तिन जनाको दरबन्दी व्यवस्था गरिएको छ । यस सेवा केन्द्रबाट सामान्य स्वास्थ्य परीक्षण, औषधि वितरण, मातृ तथा शिशु स्वास्थ्य सेवा, खोप सेवा, परिवार नियोजन परामर्श लगायतका आधारभूत सेवाहरू प्रदान गरिनेछ । 
अध्यक्ष मण्डलले आगामी योजनाबारे जानकारी दिँदै समय–समयमा विशेषज्ञ चिकित्सकमार्फत स्वास्थ्य परामर्श सेवा सञ्चालन गरिने तथा निःशुल्क स्वास्थ्य शिविरहरू आयोजना गरिने बताउनुभयो । यसले विशेषगरी आर्थिक रूपमा कमजोर तथा यस वडाका नागरिकहरूलाई ठूलो राहत पुग्ने अपेक्षा गरिएको छ ।
कार्यक्रमका प्रमुख अतिथि स्वास्थ्य कार्यालय महोत्तरीका प्रमुख नबल किशोर साहले आधारभुत स्वास्थ्य सेवा केन्द्र स्थापना भएकोमा खुसी व्यक्त गर्दै जिल्ला स्वास्थ्य कार्यालय महोत्तरीको तर्फबाट आवश्यक सहयोग उपलब्ध गराइने प्रतिबद्धता जनाउनुभयो । उहाँले स्वास्थ्य सेवाको गुणस्तर र पहुँच दुबैलाई सुदृढ बनाउन स्थानीय तहसँग सहकार्य अपरिहार्य रहेको धारणा राख्नुभयो । 
त्यसैगरी गाउँपालिकाका स्वास्थ्य संयोजक महेन्द्र मण्डलले यसअघि गाउँपालिकाका ६ वडामध्ये ५ वटामा स्वास्थ्य संस्था सञ्चालनमा रहेको र अब वडा नं. १ मा समेत सेवा सुरु भएसँगै सम्पूर्ण वडामा स्वास्थ्य सेवा विस्तार भएको जानकारी दिनुभयो । उहाँले यस उपलब्धिलाई गाउँपालिका नेतृत्व, जनप्रतिनिधि तथा स्थानीय समुदायको सामूहिक प्रयासको परिणामका रूपमा व्याख्या गर्नुभयो ।
कार्यक्रममा वडा अध्यक्ष मनोज मण्डलले पनि आफ्नो धारणा राख्दै आधारभुत स्वास्थ्य सेवा केन्द्र सञ्चालनले वडावासीको दैनिक जीवनमा सकारात्मक प्रभाव पार्ने विश्वास व्यक्त गर्नुभयो । उहाँले स्थानीयवासीलाई उपलब्ध सेवाहरूको अधिकतम उपयोग गर्न आग्रह गर्नुभयो । 
स्थानीयवासीहरूले समेत स्वास्थ्य केन्द्र स्थापना भएपछि समय, खर्च र श्रमको बचत हुने भन्दै खुसी व्यक्त गरेका छन् । विगतमा सामान्य स्वास्थ्य सेवा लिन समेत अन्य स्थान धाउनुपर्ने बाध्यता रहेको अवस्थामा अब आफ्नै वडामा सेवा उपलब्ध भएपछि नागरिकको स्वास्थ्य सुरक्षामा सुधार आउने अपेक्षा गरिएको छ ।
प्रत्येक वडामा स्वास्थ्य सेवा विस्तार गर्ने सरकारको नीतिअनुसार स्थापना गरिएको यो सेवा केन्द्रले स्थानीयस्तरमा स्वास्थ्य चेतना अभिवृद्धि, रोगको समयमै पहिचान तथा उपचारमा महत्वपूर्ण योगदान पुर्याउने विश्वास गरिएको छ । साथै, यसले समग्रमा समुदायको जीवनस्तर सुधारमा समेत सकारात्मक प्रभाव पार्ने देखिन्छ ।
