सर्लाही,२१ फागुन । सर्लाहीमा प्रतिनिधि सभा सदस्य निर्वाचन अन्तर्गतको मतगणना प्रक्रिया शुक्रबार बिहान मात्रै सुरु हुने भएको छ । सर्लाहीका मुख्य निर्वाचन अधिकृत पुष्पराज थपलियाका अनुसार भोलि शुक्रबार बिहान सर्वदलीय बैठक बसेपछि मात्र मतगणना प्रक्रिया सुरु गरिनेछ । उनले सबै पक्षको सहमतिमा मतगणनालाई व्यवस्थित र पारदर्शी बनाउनका लागि सर्वदलीय बैठक आवश्यक रहेको बताए । मतदान सम्पन्न भएसँगै विभिन्न मतदान केन्द्रबाट मतपेटिका संकलन गरी कडा सुरक्षा व्यवस्थासहित मतगणना स्थलमा ल्याउने कार्य भइरहेको छ । सबै मतपेटिका सुरक्षित रूपमा मतगणना स्थलमा पुगेपछि बैठक बसेर मतगणनाको औपचारिक प्रक्रिया सुरु गरिने निर्वाचन कार्यालयले जनाएको छ । जिल्लामा मतदान शान्तिपूर्ण रूपमा सम्पन्न भएको र अहिले मतपेटिका संकलन तथा व्यवस्थापनको काम जारी रहेको बताइएको छ ।
