सप्तरी । जनता समाजवादी पार्टी (जसपा) नेपालका अध्यक्ष उपेन्द्र यादवले अधिकार सम्पन्न सङ्घीयताको रक्षा र मधेसको मुक्ति नै आफ्नो पार्टीको मुख्य एजेन्डा भएको बताएका छन् ।
सप्तरीको डाक्नेश्वरी नगरपालिकास्थित पत्थरगाडामा आयोजित युवा विद्यार्थीहरूको क्षेत्रीय भेला तथा प्रशिक्षणलाई सम्बोधन गर्दै उनले यी लक्ष्य प्राप्तिका लागि जस्तोसुकै सङ्घर्ष गर्न तयार रहेको उद्घोष गरेका हुन् ।
सप्तरी क्षेत्र नम्बर ३ बाट प्रतिनिधि सभा सदस्यका उम्मेदवार समेत रहेका यादवले सङ्घीयता मधेस जनविद्रोहको जगमा स्थापित भएको चर्चा गर्दै यो कांग्रेस र एमालेको एजेन्डा कहिल्यै नभएको दाबी गरे। यादवले राष्ट्रिय स्वतन्त्र पार्टी (रास्वपा) प्रति आक्रामक रूपमा प्रस्तुत हुँदै उक्त पार्टीले चुनावमा बहुमत पाए सङ्घीयता नै खारेज गर्ने दाउमा रहेको आरोप लगाए ।
रास्वपाले प्रदेशमा उम्मेदवार खडा नगर्नुले नै उसको नियत प्रस्ट भएको उनको तर्क थियो। मधेस प्रदेशको नामकरणका समयमा पनि कांग्रेस र एमालेले मधेसी पहिचान स्विकार्न नचाहेको स्मरण गर्दै यादवले मधेस केन्द्रित दलहरूको दुई तिहाइ बहुमत नभएको भए पहिचानमा आधारित प्रदेश बन्न असम्भव रहेको उल्लेख गरे । देशका अन्य प्रदेशहरू नदीको नामबाट राखिनु अव्यवहारिक भएको भन्दै उनले मधेस मात्र पहिचान बोकेको प्रदेश भएको बताए ।
मुलुकमा अझै पनि मधेसी र उत्पीडित समुदायले अधिकारका लागि लड्नुपर्ने अवस्था विद्यमान रहेको यादवको भनाइ छ। मेचीदेखि महाकालीसम्मको २२ जिल्लालाई मधेस मान्नुपर्नेमा त्यसलाई विभाजित गरिएको र कर्मचारीतन्त्रमा अझै पनि एकल जातीय वर्चस्व हाबी रहेको उनले गुनासो गरे ।
७७ जिल्लाका ६५ सिडिओ खस बाहुन समुदायकै हुनुले समान हिस्सेदारीको अभाव झल्काउने भन्दै उनले संविधान संशोधन र पुनर्लेखनका लागि जसपालाई बलियो शक्ति बनाउन अपिल गरे ।
मधेसको शिक्षा क्षेत्रलाई रणनीतिक रूपमा ध्वस्त पारिएको टिप्पणी गर्दै यादवले विद्यालय र कलेजमा शिक्षक नहुँदा मधेसी जनशक्ति लोकसेवा जस्ता प्रतिस्पर्धामा पछि परेको बताए। सङ्घीयता र आरक्षण विरोधी शक्तिहरूले मधेसी जनतालाई भ्रममा पार्न खोजिरहेको भन्दै उनले युवा विद्यार्थीहरूलाई सजग रहन आग्रह गरे ।
आगामी चुनावले मधेसको भाग्य र भविष्य फैसला गर्ने हुनाले मधेस विरोधीका झुटा आश्वासन चिर्दै अघि बढ्नुपर्नेमा उनले जोड दिए।
