जनकपुरधाम, पुस २२ । लामो समयको छलफल पछि जनता समाजवादी पार्टी नेपाल र लोसपा नेपाल बीचको एकता प्रक्रिया टुङ्गिने भएको छ । जेन–जी आन्दोलनपछि भएको राजनीतिक परिवर्तनको पृष्ठभूमिमा मधेश केन्द्रित दल जसपा नेपाल र लोसपा नेपालबीचको एकीकरण टुङ्गिन लागेको नेताहरुले दावी गरेका छन ।
विगतमा असन्तुष्टिका कारण जसपा नेपालबाट छुट्टिएर गठन भएको लोसपा नेपालबीच पुनः एकीकरण हुन लागेको हो ।
हिजो बसेको शीर्ष नेताहरुको बैठकले पार्टीको नाम जसपा नेपाल र चुनाव चिह्न छाता नै रहने सहमति गरेको एक नेताले बताएका छन । पार्टीको झण्डा, कार्यकारिणी, अन्य पदाधिकारी र राष्ट्रिय सभा सदस्य निर्वाचनसम्बन्धी एजेण्डा छलफल जारी रहेको छ ।
एकीकरणपछि पार्टीमा एकल अध्यक्ष रहनेछ, जसमा उपेन्द्र यादवको उम्मेदवारी पुष्टि भएको छ। त्यस्तै, पार्टीको अभिभावकत्वको भूमिकामा महन्थ ठाकुर रहने सर्वसम्मत सहमति बनेको छ । तर अन्तिम निर्णय अझै भइ नसकेको जसपा नेपालका महासचिव लालबाबु राउतले जनाएका छन ।
यसअघि लोसपा नेपालसँग समाहित भएका तराई–मधेश लोकतान्त्रिक पार्टी (तमलोपा) र जनता प्रगतिशील पार्टी (जप्रपा)का नेता पनि महन्थ ठाकुरको कोटाबाट जसपा नेपालमा प्रतिनिधित्व पाउने छन्। त्यसैगरी, उपेन्द्र यादव नेतृत्वको जसपा नेपालमा समाहित रेणु यादव समूह पनि कार्यकारिणीमा समेटिने सम्भावना बढी रहेको छ।
कार्यदलले विभिन्न दल र नेताहरूको व्यवस्थापन र जिम्मेवारी निर्धारण गर्ने काम गर्दैछ। बैठकले राष्ट्रिय सभा निर्वाचनका उम्मेदवारसमेत टुंगो लगाउने र महन्थ ठाकुरको नाम राष्ट्रिय सभामा अघि सारिएको स्रोतले जानकारी दिएको छ।
