गोपाल झा
महोत्तरी, साउन २ गते
महोत्तरी जिल्लाको गौशालामा एक युवाले आफ्नै छिमेकीलाई पेट्रोल छर्केर आगो लगाइ हत्या गरेका छन् भन्ने तथ्य खुलेको छ । जिल्ला प्रहरी कार्यालय महोत्तरीले शुक्रबार पत्रकार सम्मेलन गरी घटनामा संलग्न अभियुक्तलाई पक्राउ गरिएको जानकारी दिएको छ ।
गौशाला नगरपालिका–४, रजखोर निवासी ३० वर्षीय सुरेन्द्र साहले असार २६ गते दिउँसो आफ्नै छिमेकी ५३ वर्षीय बलिराम साहमाथि पेट्रोल छर्केर आगो लगाएको आरोप लागेको छ । प्रहरीका अनुसार दुईजनाबीच लामो समयदेखि पारिवारिक तथा सामाजिक विवाद चलिरहेको थियो, जसले घटनालाई हिंसात्मक रूप दिएको हुनसक्ने अनुमान गरिएको छ ।
आगो लगाइएपछि गम्भीर रूपमा जलेका बलिरामलाई सुरुमा जनकपुर अस्पतालमा उपचार गराईएको थियो । अवस्था गम्भीर भएकोले उनलाई थप उपचारको लागि काठमाडौँस्थित बर्न अस्पताल लगिएको थियो । तर, चिकित्सकीय उपचारको क्रममा बिहीबार मृत्यु भएको जिल्ला प्रहरी कार्यालय जनाएको छ । 
घटनापछि फरार रहेका अभियुक्त सुरेन्द्रलाई खोजी कार्य तीव्र बनाउँदै आएको प्रहरीले महोत्तरीको सम्सी गाँउपालीका ६ नेपाल भारत सिमानाकाबाट पक्राउ गर्न सफल भएको हो । प्रहरीले पक्राउ परेका साहमाथी थप अनुसन्धान अघि बढाएको पत्रकार सम्मेलनमा जानकारी गराएका छन् ।
महोत्तरीका एसपी हेरम्ब शर्माका अनुसार, “घटनामा प्रयोग भएको पेट्रोल कहाँबाट ल्याइएको थियो, घटनाको पछाडि थप उद्देश्य के थियो भन्नेबारे अनुसन्धान भइरहेको छ ।” सुरेन्द्रमाथि कसुर प्रमाणित भएमा ज्यान मुद्दा अन्तर्गत कारबाही प्रक्रिया अघि बढाइने प्रहरीले जनाएको छ ।
प्रहरीले मृतकको परिवारलाई न्याय सुनिश्चित गरिने र घटनामा संलग्न अन्य व्यक्ति भए अनुसन्धान गरी आवश्यक कारबाही गरिने आश्वासन दिएको छ ।
