काठमाडौं। काभ्रेमा विद्युत प्राधिकरणको लापर्वाहीले गर्दा ११ केभी करेन्ट प्रवाह भइरहेको तारजडित टावरमा चढेर काम गर्दै गरेका एक मजदुरको मृत्यु भएको छ।
मृत्यु हुनेमा सर्लाही ईश्वरपुर नगरपालिका–१२ घारिबथान बस्ने २८ वर्षीय उपेस परियार छन्। जिल्ला प्रहरी कार्यालय काभ्रेका सूचना अधिकारी डिएसपी मीनबहादुर घलेका अनुसार घटना काभ्रेको धुलिखेल नगरपालिका–७ सञ्जिवनी चोकमा भएको हो।
त्यहाँ रहेको ११ केभीको हाइटेन्सन लाइनको टावरमा चढेर तार जोड्न काम गर्दै गर्दा तारमा एक्कासी करेन्ट प्रवाह भएपछि परियारको मृत्यु भएको हो।
करेन्ट लागेर मृत्यु भएपछि परियार पोलमै अड्किएका थिए। प्रहरीले निकालेर पोस्टमार्टमका लागि धुलिखेल अस्पताल लगेको छ।
प्रत्यक्षदर्शीका अनुसार काम गरिरहेका बेला तार जडानको काम नसकिँदै विद्युत प्राधिकरण काभ्रे वितरण केन्द्रले लाइन छाड्दा परियारको मृत्यु भएको हो।
घटनाको अनुसन्धान गर्न जिल्ला प्रहरी कार्यालय काभ्रेले टोली खटाएको जनाएको छ।
