काठमाडौँ, वैशाख २ । नेकपा एमालेका अध्यक्ष केपी शर्मा ओलीले निलम्बित स्थायी कमिटी सदस्य डा विन्दा पाण्डेलाई आलोचनामा समय खर्चन छाडेर पार्टीमा सक्रिय हुन भनेका छन्।
प्रधानमन्त्री निवास बालुवाटारमा करिब ४० मिनेटको भेटका क्रममा अध्यक्ष ओलीले डा पाण्डेलाई जिम्मेवारी दिन तयार रहेको तर त्यसका लागि अनुशासनमा बसेर काम गर्नुपर्ने सर्त राखेका छन्। काठमाडौँको कीर्तिपुरमा एमालेले भाटभटेनी सुपरमार्केटका सञ्चालक मीनबहादुर गुरुङबाट जग्गा दानमा लिएर केन्द्रीय कार्यालय भवन बनाउन लागेपछि गरेको टिप्पणीका कारण ओलीले पाण्डेलाई ६ महिनाका लागि निलम्बन गरेका थिए। गत पुस ११ गते बसेको सचिवालय बैठकबाट उनलाई निलम्बन गरिएको थियो। त्यसअघि उनलाई स्पष्टीकरण पनि सोधिएको थियो।
‘सकभर मिलेर जाऊँ, पार्टीमा सक्रिय हुनुपर्छ भन्नुभयो तर उहाँ (पाण्डे)ले स्पष्ट रुपमा मानिहाल्ने कुरा गर्नुभएको छैन,’ बालुवाटार स्रोतले भन्यो, ‘मिल्ने, मिलाउने प्रयास हो। पार्टीले निर्णय गरेर उहाँ सुध्रिनुभयो भन्न सक्छ। तर, उहाँले पनि त बाहिर नबोल्ने वा केही न केही सुधारका संकेत देखिनुपर्यो।’
