जनता समाजवादी पार्टी (जसपा) नेपालका अध्यक्ष उपेन्द्र यादवले नेपाल–भारतको सम्बन्धको स्थान अरू कसैले लिन नसक्ने बताएका छन् । बुधबार दिल्ली हुँदै भारतको राजस्थान पुगेका अध्यक्ष यादवले त्यहाँ आयोजित कार्यक्रममा सो कुरा बताएका हुन् ।
उनले भने, ‘मित्रतामा नेपालका लागि भारतको विकल्प अरू कुनै देश हुन सक्दैन, यो सम्बन्ध हामीले होइन, हाम्रो पुर्खाले बनाउनु भएको छ । यो सम्बन्धलाई हाम्रो पुर्खाले स्थापित गरेका हुन् ।
अर्को छिमेकी देश चीनसँग पनि नेपालको राम्रो सम्बन्ध रहेको बताउँदै उनले भारतसँग भने नेपालको विशेष सम्बन्ध रहेको बताए । ‘नेपाल र भारतबिच रोटी बेटीको सम्बन्ध रहेको छ,’ उनले भने, ‘यताको परिवार उता बस्छ, उताको परिवार यता बस्छ । नेपाल–भारत बिचमा रहेको यो सम्बन्ध कसैले खोस्न सक्दैन ।
राजस्थानको एउटा कार्यक्रमको लागि निजी भ्रमणमा गएका अध्यक्ष यादव आजै नेपाल फर्किने कार्यक्रम थियो । तर उनी केही दिन अझै भारतको भ्रमणमा रहने बताइएको छ । उनी आज दिल्ली पुगेर विभिन्न भेटघाट गर्ने कार्यक्रम रहेको पार्टी स्रोतले जनाएको छ ।
जसपा नेपालका विदेश विभागका प्रमुख अर्जुन थापाले यादव आफ्नो निजी भ्रमणमा भारत गएको र यस बारेमा आफूलाई थप कुनै जानकारी नरहेको बताए ।
जसपाका अध्यक्ष उपेन्द्र यादव फागुन १२ गते दुबईबाट फर्केका थिए । उनी दुबईबाट फर्केपछि एउटा कार्यक्रमका लागि पार्टीका उपाध्यक्ष राजकिशोर यादव फागुन १३ गते दिल्ली गएका थिए ।
साउथ एसिया फाउन्डेसन नेपालले आयोजना गरेको कार्यक्रममा सहभागी हुन उपाध्यक्ष यादव दिल्ली गएका थिए । उपाध्यक्ष यादवले कार्यक्रमको क्रममा विभिन्न उच्च स्तरीय भेटघाट गरेर नेपाल फर्केका थिए ।
जसपा नेपालका अध्यक्ष उपेन्द्र यादवले २० केन्द्रीय समितिको बैठक सकाएर २१ गते भारत पुगेका छन् ।
नेपाल–भारत बिच सम्बन्ध चिसिएको बेला नेताहरू दिल्ली दौडधुपमा लागेका छन् ।
यसअघि नेपाली काँग्रेसका नेता एवं पूर्वप्रधानमन्त्री डा. प्रकाशरण महत, सोही पार्टीका नेता अर्जुन नरसिंह केसी, एमालेका उपाध्यक्ष सुरेन्द्र पाण्डे, उपमहासचिव प्रदीप ज्ञवाली, राष्ट्रिय स्वतन्त्र पार्टीका उपसभापति डा.स्वर्णिम वाग्लेलगायतका नेताहरू पनि विभिन्न कार्यक्रमको बहानामा भारत पुगेर फर्किसकेका छन् ।
