धिरेन्द्र राय
महोत्तरी, माघ ८ गते । ट्राफिक कार्यालय जलेश्वरले पुस महिनामा ६६४ वटा सवारीहरुलाई विभिन्न किसिमको जरिवानाबाट ९ लाख ६६ हजार रुपैया राजश्व संकलन गरेको छ ।
ट्राफिक कार्यालय जलेश्वरका प्रमुख प्रहरी सहायक निरिक्षक सुनिल जङ्ग साहले जलेश्वर नगरपालिका, मटिहानी नगरपालिका तथा पिपरा गाउँपालिकाको कार्यक्षेत्रबाट एक महिनामा सो राजश्व उठाउन सफल भएको जानकारी दिनुभयो ।उहाँले सो क्रममा सबभन्दा बढी ट्रकलाई कारवाहीको दायरामा ल्याइएको बताउनुभयो । पुस महिनामा मात्रै ४०६ ट्रकलाई विभिन्न ट्राफिक उल्लंघनको घटनाबाट राजश्व तिराइएको प्रमुख साहले बताउनुभयो ।
उहाँले २१८ मोटरसाइकल, १६ कार, १० अटो, ३ ट्रेक्टर तथा ११ बसलाई जरिवाना तिराइएको वताउनुभयो ।
ट्रकका चालकहरुले तोकिए भन्दा बढी स्पिड तथा क्षमता भन्दा बढी सरसामान राखेको पाइएपछि जरिवानाको दायरामा ल्याएको तथा मोटरसाइकलका चालकहरुले हेल्मेट नलगाएको, ब्लुबुक र लाइसेन्स नबोकेकोले जरिवाना गराइएको बताउनुभयो ।
उहाँले प्रतिदिन ट्राफिक प्रहरी विभिन्न रुटमा सवारी चालकहरुलाई जनचेतनामूलक जानकारी समेत उपलब्ध गराउने गरिएको बताउनुहुदै अटेर गर्ने चालकहरुलाई कानूनी दायरामा ल्याएर जरिवाना तिराउने गरिएको बताउनुभयो ।
