पोखरा । गण्डकी प्रदेशका सांसद तथा पूर्वमन्त्री राजीव गुरुङ (दीपक मनाङे) कारागार चलान भएका छन् । मंगलबार बिहान काठमाडौँबाट पक्राउ परेका उनलाई कारागार पठाइएको हो ।
मनाङेलाई कर्तव्य ज्यान मुद्दामा सर्वोच्च अदालतले दोषी ठहर गरी ५ वर्ष कैद सुनाएको छ । २०६९ मा पाटन अदालतले गरेको फैसलालाई नै सर्वोच्चले सदर गरेको हो ।
मनाङे दोषी ठहर भएर कारागार गइसक्दा समेत सर्वोच्चले प्रदेश सभालाई फैसलाको जानकारी पठाएको छैन । जसका कारण उनको सांसद पद कायम छ ।
सभामुख कृष्ण धितालले सर्वोच्चको पत्र बिना केही गर्न नमिल्ने बताए । ‘संसद्लाई जानकारी हुनुपर्छ । औपचारिक जानकारीपछि एक्सनमा जान्छौँ,’ उनले भने, ‘पत्र पाएपछि सूचना टाँस्छौँ ।’ २० गते मनाङेविरुद्ध फैसला भएको थियो । तर पूर्ण पाठ सार्वजनिक भइसकेको छैन ।
