छुरा हानेर हत्या गर्ने अर्जुन पटकपटक अपराधमा संलग्न रहेको खुलासा

जनकपुरधाममा छुरा प्रहार गरी युवकको हत्या आरोपमा पक्राउ परेका अर्जुन साह लागूऔषध सेवनकर्ता र अपराधी रहेको खुलेको छ । गत सोमबार पौने १ बजे दिउँसो जनकपुरधामको विश्वकर्माचोक नजिक महोतरी एकडरा गाउँपालिका ३ भटोलियाटोलका २० वर्षीय प्रिन्स महासेठको छुरा प्रहार गरी हत्या भएको थियो ।
हत्या गरेको आरोपमा पक्राउ परेका जनकपुरधाम उपमहानगरपालिका ४ का २२ वर्षीय अर्जुन भन्ने अजय साह लागूऔषध सेवनकर्ता र अपराधी प्रवृत्तिको रहेको खुलेको हो ।
पक्राउ परेका अर्जुन विगत २०७२ यता पटक पटक अपराधमा संलग्न रहेको जिल्ला प्रहरी कार्यालय धनुषाले जनाएको छ ।
आफू यस एरियाको दादा रहेको दावी गर्ने, भारतीय नाकाहरुमा गई लागूऔषध नाईट्रोभेट ट्याब्लेट, गाँजा र भाङ सेवन गर्ने गराउने र भनेको कुरा नमाने मौका पाएको बखत कुटपिट गर्ने प्रवृतिको रहेको धनुषाका प्रहरी प्रवक्ता डिएसपी रञ्जन अवाले बताए ।
उनका अनुसार अर्जुन पटक पटक अपराधमा पक्राउ परेको र जिल्ला प्रहरी कार्यालय धनुषाबाट मुद्दा चलाइएर पुर्पक्षका लागि कारागारसमेत चलान भएर छुटेका व्यक्ति हुन् ।
७ वैशाखमा अर्जुन चोरी मुद्दामा पक्राउ परेर धनुषा जिल्ला अदालतको आदेशमा पुर्पक्षका लागि जलेश्वर कारागार पठाइएपछि पछि छुटेका थिए । छुटेको केही समयपछि गत मंसिर ६ गते पुनः अपराधमा उनीमाथि जिल्ला प्रहरी कार्यालय धनुषाले पक्राउ गरेर अभद्र व्यवहार मुद्दामा चलाइएको थियो । त्यस अघि २०७८ मंसिर २१ गते उनीमाथि प्रहरीले सार्वजानिक शान्ति विरुद्धको कसुर मुद्दामा पक्राउ भई मुद्दा चलाएको थियो ।
२०७२ साउन ३२ मा उनीमाथि सार्वजानिक अपराध सम्बन्धी कसुरमा मुद्दा दर्ता भएको डिएसपी अवाले बताए । प्रिन्स हत्या आरोपमा अर्जुनमाथि कर्तव्यज्यान मुद्दा दर्ता गरी अनुसन्धान गरिरहेको डिएसपी अवाले बताए ।