काठमाडौं, चैत १८ । नेपाली कांग्रेसका छौ जना शीर्ष नेताहरुको अनौपचारिक भेटघाट पूर्व उपसभापति विमलेन्द्र निधि निवास नयाँ बानेश्वरमा बसेको बसेको छ ।
शनिबार बिहान बसेको दुई घण्टा लामो बैठकमा गोपालमान श्रेष्ठ, प्रकाशमान सिंह, विमलेन्द्र निधि, विजय गच्छदार, कृष्णप्रसाद सिटौला र डा. शशांक कोइराला सहभागि थिए ।
नेताहरुबीचको अनौपचारिक भेटघाटमा राजधानीमा भएको प्रतिगमनकारी एवं आपराधिक घटनाको भत्र्सना गर्दै जनताको जीउधनको सुरक्षामा कडाई गर्न सरकारको ध्यानाकर्षण गराइएको छ ।
घटनामा समाचार संकलनका क्रममा एभिन्यूज टेलिभिजनका पत्रकार सुरेश रजक र कीर्तिपुरका सबिन महर्जनको निधनप्रति दुःख व्यक्त गर्दै घाइतेहरुको शीध्र स्वास्थ्यलाभको कामना गरिएको छ । यसैगरी, तीनकुनेमा भएको प्रदर्शनको घटनाको छानवीन गरी घटनामा संलग्न दोषीमाथि तत्काल कार्बाहीको मागसमेत गरिएको छ । एकीकृत समाजवादीको पार्टी कार्यालयमा भएको तोडफोडको भर्त्सना गरिएको छ । साथै, कान्तिपुर टेलिभिजन, अन्नपूर्ण पोष्ट दैनिक, अनलाईनखबरमा भएको आक्रमण, जडिबुटी प्रशोधन तथा भाटभटेनी लगायतका व्यापारिक गृहमा भएको तोडफोड र लुटपाटकोघटनाको भर्त्सना गरिएको छ ।
छलफलमा पछिल्लो राजनीतिक घटनाक्रम, समसामयिक राजनीति र कांग्रेसको १५ औं महाधिवेशनमा समेत केन्द्रित रहेको थियो । संघीय लोकतान्त्रिक गणतन्त्रात्मक शासन प्रणालीको पक्षमा जनमतलाई सुदृढ पार्ने र नेपाली कांग्रेसको संगठनात्मक सुदृढीकरणका लागि पार्टीलाई एकताबद्ध गराएर संगठन परिचालन गर्नु आजको प्रमुख आवश्यकता भएको बारे छलफल भएको थियो ।
भेटघाटमा अरु शीर्ष नेताहरुलाई समाबेश गर्दै यस्तो किसिमको भेटघाट आगामी दिनमा जारी राख्ने समझदारी भएको निधि सचिवालयले जनाएको छ ।
