गोपाल झा ,महोत्तरी, साउन १४ गते
जनता समाजवादी पार्टी नेपालका केन्द्रीय कार्यकारिणी सदस्य तथा संघीय सरकारका पूर्व स्वास्थ्य राज्यमन्त्री डा. सुरेन्द्र यादवले मधेश प्रदेश उत्पादन गर्ने राजस्वको कम्तीमा ५० प्रतिशत हिस्सा फिर्ता पाउन सकेको खण्डमा यो प्रदेश आफैमा समृद्ध बन्न सक्ने बताएका हुन् । 
महोत्तरी जिल्लाको मनरा सिस्वा नगरपालिकास्थित रामजानकी टोल विकास समितिको उद्घाटन समारोहमा बोल्दै उनले भने, “मधेश प्रदेशले योगदान गरेको राजस्वको मात्र ५० प्रतिशत हिस्सा फिर्ता पाइयो भने हाम्रो प्रदेश आफैमा आत्मनिर्भर र समृद्ध बन्न सक्छ ।“
पूर्व स्वास्थ्य राज्यमन्त्री यादवले समारोहमा हाल मधेश प्रदेशमा गहिरिँदै गएको जल संकटप्रति गम्भीर चिन्ता व्यक्त गरेका हुन् । उनले चुरे क्षेत्रको विनाशले भू–जल स्रोतमा प्रतिकूल प्रभाव पारेको बताउँदै, “यदि अब पनि चुरे विनाश रोकिने उपाय अपनाइएन भने आउँदा दिनमा मधेश प्रदेश जल संकटको भयावह अवस्थामा पुग्न सक्छ । त्यसैले चुरे क्षेत्रको संरक्षण अहिलेको प्रमुख आवश्यकता हो,“ भन्दै सम्पूर्ण सरोकारवालाहरुलाई सजग हुन आह्वान गरेका हुन् ।
स्थानीय सरकारहरूलाई लक्षित गर्दै उनले बजेट विनियोजनमा शिक्षा, स्वास्थ्य र कृषि क्षेत्रलाई प्राथमिकता दिनुपर्नेमा जोड दिएका हुन् । उनले गुनासो गर्दै भने, “अहिले अधिकांश स्थानीय तहहरू वितरणमुखी र खरिदमुखी बजेट खर्च गरिरहेका छन्, जुन दीर्घकालीन विकासको बाधक हो ।
खानेपानीको समस्या ट्यांकरबाट अस्थायी रूपमा समाधान गर्न खोजिएकोमा असन्तुष्टि जनाउँदै डा. यादवले तत्काल खानेपानीको दीर्घकालीन समाधानका लागि डिप बोरिङ र पानी टंकी निर्माण गरेर हरेक वस्तीमा धारा पुर्याउनुपर्ने सुझाव दिएका छन् । 
समारोहमा खेलकुद विभागका सदस्य रोशन सिंह राणाले महोत्तरीको अधिकांश क्षेत्र भारतीय सीमासँग जोडिएको हुँदा सर्वसाधारणले दैनिक उपभोग्य वस्तु ल्याउँदा समेत सुरक्षाकर्मीबाट दुर्व्यवहार भोग्नुपरेको बताए । साथै, उनले खानेपानीको चरम अभाव, कृषकका लागि सिंचाइको अभाव र शिक्षा क्षेत्रको दयनीय अवस्था रहेकोप्रति गम्भीर ध्यानाकर्षण गराउँदै रामजानकी टोल सुधार समितिलाई स्थानीय सरकारलाई खबरदारी गर्न आग्रह गरे । 
कार्यक्रममा मनरा सिस्वा नगरपालिका वडा नं. ५ का अध्यक्ष हदिस अन्सारीले यस वडाका लागि नगरपालिकाले जम्मा ४५ लाख रुपैयाँ मात्र बजेट विनियोजन गरेको स्वीकार गर्दै, उक्त बजेटले आवश्यकताअनुसारको समग्र विकास सम्भव नभएको बताए ।
कमलदेव मण्डलको अध्यक्षतामा नवगठित नौ सदस्यीय रामजानकी टोल सुधार समितिमा राजो देवी उपाध्यक्ष, अवधेश दुब्बे सचिव र रामकिशोर साह सहसचिव चयन भएका छन् । 
उक्त उद्घाटन समारोहमा पूर्व वडाध्यक्षका प्रत्यासी रुपनारायण भगत, संजीव सिंह, सञ्चारकर्मी तथा विभिन्न राजनीतिक दलका स्थानीय नेता तथा सामाजिक व्यक्तित्वहरूको उल्लेख्य उपस्थिति रहेको थियो । कार्यक्रम संयोजनमा रामजानकी टोल सुधार समितिका नव निर्वाचित सदस्यहरूको सक्रिय भूमिका रहेको थियो ।
