प्रतीक्षा खबर
रामगाेपालपुर, असार ७ गते ।
नेपालमा कोरोनाबाट थप एकजनाको मृत्यु भएको छ । यो सँगै कोरोनाबाट मृत्यु हुनेको संख्या २३ पुगेको छ । गुल्मीमा होम क्वारेन्टिनमै मृत्यु भएका ६९ वर्षीय पुरुषमा कोरोना पुष्टि भएको हो ।
यसअघि २२ जनाको मृत्यु भएको स्वास्थ्य तथा जनसंख्या मन्त्रालयले दिइसकेको छ ।
गुल्मीका प्रमुख जिल्ला अधिकारी भरतकुमार शर्माले आज (आइतबार) बिहान दिएको जानकारीअनुसार ती व्यक्तिको मृत्यु होमक्वारेन्टिनमै रहेका बेला बिहीबार साँझ मृत्यु भएको थियो । ‘त्यसपछि स्वाब परीक्षणका लागि लुम्बिनी प्रादेशिक अस्पतालकाे प्रयोगशाला पठाइएकामा हिजो (शनिबार) दिउँसो रिपोर्ट कोरोना पोजिटिभ आयो,’ उनले भने ।
प्रमुख जिल्ला अधिकारी शर्माका अनुसार ती व्यक्ति प्यारालाइसिसको दीर्घरोगी थिए। भर्खरै भारतबाट उपचार गराएर घर फर्केका थिए ।
‘ठ्याक्कै दिन त अहिले याद भएन, तर होमक्वारेन्टिनमा बसेको त्यस्तै ८–१० दिनमा उनको मृत्यु भएको हो,’ उनले भने, ‘उतै संक्रमण भएको थियो कि? अहिले उनको सम्पर्कमा रहेका व्यक्तिको कन्ट्याक्ट ट्रेसिङ गरिरहेका छौं ।’
