भारतको नयाँ दिल्लीमा भोकले एक नेपाली युवकको मृत्यु

प्रतिक्षा खबर
रामगाेपालपुर, जेठ २३ गते ।
भारतको नयाँ दिल्लीमा भोकले एक नेपाली युवकको मृत्यु भएको छ ।
नयाँ दिल्लीको एक सिलाई कारखानामा काम गर्दै आएका महोत्तरीको मनरासिसवा नगरपालिका ८ सहसरामका १८ वर्षीय रोस्तम अन्सारीको खान नपाएर मृत्यु भएको छिमेकी रमेशकुमार साहले जानकारी दिए ।
रोस्तमसँगै उनका छिमेकी इन्ताज अन्सारी र मेहबुब अन्सारी तीन वर्षदेखि उक्त सिलाइ कारखानामा कार्यरत्त थिए ।
गएको मंगलबार राति भोकले नै सहकर्मी रोस्तमको मृत्यु भएपछि उनका छिमेकी दुई युवक भागेर नयाँ दिल्लीबाट ट्रेन समातेर घरको लागि हिँडेको घरमा फोन गरी जानकारी गराएका छन् ।
मृतक युवक रोस्तमका बुबा अन्बर अन्सारीको १५ वर्ष अघि ट्रक दुर्घटनामा मृत्यु भएको थियो । घरमा रोस्तमका आमा मात्रै रहेकी छन् । छोराको मृत्युको खबरले अामा मर्माहत भएकी छन् । एक मात्र छोराको मृत्युले उनको जीवन बिचल्लीमा परेको स्थानीयले जनाएको छ । विपन्नताको कारण छोरा मजदुरी गर्न नयाँ दिल्ली पुगेका थिए ।