कोरोना भाइरस रोकथाम र नियन्त्रणमा सरकारले चारै सुरक्षा निकायहरु सेना, प्रहरी, सशस्त्र प्रहरी बल र राष्ट्रिय अनुसन्धानका गरी ८२ हजार ६ सय ५० सुरक्षाकर्मीहरु परिचालन गरेको छ ।
सरकारले कोरोना भाइरसलाई रोकथाम र नियन्त्रण गर्न खडा गरेको कोभिड–१९ विपद् व्यवस्थापन केन्द्र (सीसीएमसी) ले आइतबार पत्रकार सम्मेलन गरी उक्त संख्याको बारेमा जानकारी दिएको हो।
छाउनीमा रहेको सीसीएमसी अन्तरगत रहेको शान्ति सुरक्षा व्यवस्था अन्तरगत लकडाउनको आदेशलाई पूर्ण रुपले कार्यान्वयन गर्न सेनाका ७ हजार ४ सय ८६, प्रहरीका ४२ हजार १२, सशस्त्र प्रहरीका ३१ हजार एक सय ५५ र राष्ट्रिय अनुसन्धानका एक हजार ९ सय ९७ सुरक्षाकर्मीहरु परिचालित भएका हुन्।
नेपालको अन्तर्राष्ट्रिय सीमानाकाबाट आवागमनमा कडाइका साथ निगरानी गर्नको लागि सशस्त्रका ६ सय ५० चेक पोष्ट रहेकोमा हाल बढाएर एक हजार दुई सय १३ कायम गरिएको र २२ हजार ६ सय १६ जनशक्ति खडा गरिएको सीसीएमसीले जनाएको छ।
यस्तै, नेपाल–भारत सीमापारी क्वाारेन्टाइनमा रहेका नेपालीहरुको विवरण सिमाना जोडिएका जिल्ला प्रमुख जिल्ला अधिकारीमार्फत् संकलन गर्ने कार्य भइरहेको सीसीएमसीले जनाएको छ।
सीसीएमसीले हालसम्मको तथ्यांक अनुसार नेपाल–भारत सीमा नाकामा नेपालतर्फ एक हजार ७६ जना भारतीय र भारततर्फ दुई हजार २० नेपाली नागरिकहरु क्वारेन्टाइनमा रहेको जानकारी दिएको छ।
हालसम्म लकडाउन उल्लंघन गर्ने ९९ हजार चार सय १९ सर्वसाधरण र ४३ हजार सात सय ६१ सवारी साधन प्रहरी नियन्त्रणमा लिइएको सीसीएमसीले जनाएको छ। जसमध्ये ९९ हजार चार सय १४ सर्वसधारण र ३५ हजार चार सय २३ सवारी साधन नियन्त्रणमा लिएर छाडिएको सीसीएमसीले जनाएको छ।
यस्तै, हालसम्म देशभर ३९ हजार आठ सय २४ क्वारेन्टाइन बेड र ३० हजार आइसोलेसन बेड संख्या व्यवस्थापन भएको सीसीएमसीले जनाएको छ। वैशाख १३ सम्मको विवरण अनुसार १४ हजार ७ सय ३१ जना क्वारेन्टाइनमा रहेको र ८७ जना आइसोलेसनमा छन्।
पत्रकार सम्मेलनमा हालको अवस्था र हुन सक्ने महामारीको आंकलन एवं मूल्यांकन गरी सोहि अनुसार भविष्यमा चाल्नु पर्ने कदमहरुको कार्यनीति पनि बनाउने कार्य भइरहेको जनाएको छ। उक्त कार्यको लागि सीसीएमसीले स्वास्थ्य सेवा तथा उपचार, आपूर्ति तथा अत्यावश्यक सेवा, शान्ति सुरक्षा र मिडिया तथा सूचना प्रविधि लगायतका विषयहरुमा समन्वयत्मक भूमिका निर्वाह गर्दै आइरहेको बताएको छ।
