धनुषाको मिथिला नगरपालिका वडा नं. २ नक्टाझिजमा आज वडा कार्यालयमा बसेको सर्वदलिय बैठकले कोरोनाको सम्भावित जोखिमलाई मध्यनजगर गर्दै वडामा अपरिचित र शंकास्पद व्यक्तिको प्रवेशमा रोक लगाउने निर्णय गरेको छ । बैठकले वडा नं. २ मा सबैबाटोमा अपरिचित र शंकास्पद व्यक्तिलाई प्रवेश गर्न नदिइएने र गरेको पाएइमा सोधपुछ गरी शंका लागेका प्रहरीको जिम्मा लगाउने निर्णय गरेको छ । साथै बैठकले वडाभरिमा बाहिरबाट तरकारी, फलफुल लगायतको समान बेच्न आउने व्यक्तिलाई समेत रोक लगाएको वडाअध्यक्ष विहारी महतोले बताएका छन् ।
त्यस्तै वडाभरी माछामासु, दारु विक्री वितरण पूर्ण रुपमा बन्द गराउने र बाहिरबाट आउने भुसाको ट्रकलाई समेत कडा निगरानी गरी मात्र गाउँमा प्रवेश गर्न दिइने र चालक तथा खलासीलाई ट्रकभित्रै बस्नु पर्ने नियम लगाएको अध्यक्ष महतोले जानकारी दिएका छन् ।
कोरोना महामारीको समयमा वडामा सर्वदलिय समितिको बैठकले गरेको उक्त निर्णयलाई पालना गरिदिनुहुन आग्रह गर्नुभएको छ । उक्त निर्णय कडाइका साथ कार्यान्वय गरिने र नियमको उल्लघन गर्ने जो कोहीलाई पनि नेपाल सरकार हाल प्रचिलित कानुन अनुसार कारवाही गर्ने उहाँले बताउनुभयो ।
